Finfinnee, Sadaasa 28/2023 – Kaabineen bulchiinsa magaalaa Finfinnee raawwii tajaajila bulchiinsa magaalattii gar tokkoon qaama sadaffaaf dabarsee kennuuf erga murteessee torban tokko booda, Biiroon Daldala magaalatii tajaajila gurguddoo 11 keessaa jaha qaama sadaffaaf kennuudhaaf qophaa’aa jiraachuu beeksise.
Biiroon kun dhiheenya kana raabsaa meeshaalee nyaataa bu’uuraa, bulchiinsa wiirtuuwwan gabaa, galmee fi hayyama daldalaa akkasumas qorannoo gatii gabaa fi tajaajila ergaa poostaa dabalatee tajaajiloota gurguddoo jaha qaama sadaffaaf kennuuf sadarkaa xumuraa irra akka jiru beeksiseera.
Tajaajiloota kanneen keessaa raabsaan meeshaalee bu’uuraa, galmee fi hayyama daldalaa akkasumas hooggansa wiirtuuwwan gabaa adeemsa kan dursa kennamuufii ta’u isaa qindeessaan koree Alamaayyoo Dachaasaa himaniiru.
Biiroon kun magaalaatti keessatti waldaalee hojii gamtaa 140 bulchuun, meeshaalee nyaataa deeggarsa kanneen akka sukkaara, zayita nyaataa, daakuu qamadii fi kan kana fakkaatan raabsa. Waggaa darbe waldaaleen hojii gamtaa kunneen sukkaara kuntaala miiliyoona 1.4, zayita nyaataa liitira miiliyoona 90, daakuu qamadii kuntaala miiliyoona 1.9 gurguraniiru.
Waggoota dhiyoo asitti biiroon kun raabsa meeshaalee nyaataa barbaachisoo deeggarsaa kana qaama sadaffaaf kennuuf qorachaa tureera. Dhaabbanni sirna hordoffii dijitaalaa qabu Maakibaa PLC jedhamuu meeshaalee nyaataa ijoo kanneen akka sukkaara, zayita nyaataa fi daakuu qamadii kallattiin kutaa magaalaa Kolfee Qaraaniyoo keessa jiraniif raabsuuf itti gaafatamummaa fudhate jira.
Torbe darbe keessatti, biiroon kun raabsa meeshaalee barbaachisoo balbalaa hanga
balbalaa teknooloojiin gargaarammee kutaa magaalaatti kan akka Lidataa fi Nifaas Siilk Laaftoo hammachuudhaan Muddee 2023 irraa eegalee babal’isuuf murteessee ture.
Biirichi magaalattii keessatti iddoowwan adda addaa shan keessatti wiirtuuwwan gabaa ijaaruufis adeemsarra jira. Dhiheenya kana wiirtuun gabaa oomisha qonnaa kutaa magaalaa Kolfee Qaraaniyoo keessatti argamu bakka kantiibaan magaalittii Adaanach Abeebee argamanitti ifatti banameera. Giddu-galli gabaa kun, walumaa galatti manneen daldalaa 79 kan qabu yoo ta’u, isaanis iskiriinii LED gatii agarsiisan ammayyaa ta’e of keessa qaba.
Akka Alamaayyoo jedhutti, Biiroon Pablik Sarvisii fi Misooma Qabeenya Namaa bulchiinsa magaalaa Finfinnee, sadarkaa magaalichatti hojiiwwan qaama dhuunfaa dabarafaaman kan qindeessuu fi itti gaafatamummaa kan qabu kun amma yaada biiroo kanaa gamaaggamaa jira. Murtoon irra erga gahamee booda adeemsi hojii qaama sadaffaaf kennu ni raawwatama jedheera.
Biiroon Daldala magaalaa Finfinnee tajaajiloota kana gara qaama sadaffaaf akka dabarsuuf torbee darbe Manni Maree Bulchiinsa Magaalaa Finfinnee murteesseera. Adeemsa kanaan tajaajila bulchiinsa magaalatti dhaabbilee 46 ta’aniif kennuuf murteessu isaa ibsameera.
Torban darbe itti gaafatamaan biiroo siivil sarviisii fi misooma qabeenya namaa kan ta’an Obbo Hikmaa Keeyrediin waajjiraalee fi hospitaalonni bulchiinsa magaalichaa jala jiran shan tajaajila isaanii dhaabbilee dhuunfaaf akka kennamu ibsaniiru. Isaan keessaa biiroowwan daldalaa, geejjibaa, misooma mana jireenyaa fi bulchiinsa akkasumas Abbaa Taayitaa Hayyamaa fi Inspeekshinii Konistiraakshinii fi Abbaa Taayitaa Hayyamaa fi Inspeekshinii Konkolaataa Mootoraa ni dabalata jedhameera.
Hospitaalonni Yekaatit 12 fi Raas Daasta Daamxeew Memoriyaal, Biiroo Fayyaa magaalaa Finfinnee jalatti argamanis tajaajiloota murtaa’an qaama sadaffaaf kennuuf qophaa’aniiru. AS
